Veujoar 2008

Even veurstellen: Harry Töben.

As kind (geboren in 1942) heb k op Muzzelknoal woond. Wie pruiten Grunnegs. Toun k vieftien joar was gung k noar zee. k Heb in Stad aan de Hogere Zeevaart School stedaard veur stuurman op de grode voart.  Op mien dattegste bin k aan de wale goan.
Mit vraauw en kinder heb k eerst op Stadsknoal en doarnoa op Hoogezand woond.
Deur waark bin k in Vraisland terechte kommen. Doar heb k vievendatteg joar woond.
Op t heden woon k in Stad.

In 1985 heb k mie omscholen loaten tot journalist. Veur de lol heb k iemen en bin k specialiseerd in koninginnenteelt. Over dat onderwaarp  heb k n bouk schreven.
Deur omstandegheden mos k eerder stoppen mit waarken.  k Bin nou pensioneerd en heb tied aan mie zulf.
In tied dat k in Vraisland woonde begon mien Grunnegs te slieten. Ain-, twijmoal in t joar kwam k n poar uur in Grunnen en pruit k Grunnegs mit mien femilie. Woar t  Grunnegs verdween verscheen t Vrais.
Ede Staal was al sikkom vieftien joar dood, dou mien bruier mie der op wees dat Ede haile mooie laidjes in t Grunnegs mokt haar. Noadat k ter wat van heurd haar heb k alles wat ter van Ede Staal te kriegen was kocht. Ook zien dubbel-cd mit verhoaltjes dij e op zundagmörn veur radio Noord verteld haar. k Begon ook t tiedschrift Toal en Taiken te lezen.
Dou k weer tied kreeg om mit mien computer aan de loop te goan bedocht k dat nog hail wat verhoalen in de kop haar dij aigenlieks op pepier mozzen. k Huifde nait meer veur mien brood te schrieven en n dail van mien verhoalen speulden zuk òf in mien jeugdjoaren. Dat, ik nam t besloet om mien verhoalen in t Grunnegs te schrieven.
Dat vuil mie nait tou. Bie de Boukenkist in Scheemda haar k al n moal zöcht om Grunneger studiebouken. Dij wazzen der nait, behaalven t zakwoordenboukie van Siemon Reker. Dij  heb k mie kocht.
Op n joarlijkse dag van Toal en Taiken, in t Geert Teiscentrum op Stadsknoal kwam k mit Jan J. Boer aan de proat. Ik vruig hom woar of ik t Grunnegs schrieven leren kon. Hai zee mie dat as k in t Grunnegs wol schrieven, veul Grunneger bouken lezen mos en den mor gewoon begunnen te schrieven. Boukenkist en De Slegte kregen n dikke klant aan mie. 
k Kwam der achter dat gemainte Stadsknoal n schriefwedstried huil. Doar heb k aan mitdoan. k Docht, n pries zol k wel nait kriegen mor as de jury mie de fouten der uuthoald den bin k wat op glee. Der zatten hail wat fouten in. Toch kreeg k de twijde pries.

In de winter van 2005 bin k noar Stad west en heb k doar de cursus Grunneger Toal veur Begunners deurlopen. Mien schrieverij in t Grunnegs wui beter en k dus mitdoun aan de priesvroag van stichting t Grunneger Bouk om n kerstverhoal te schrieven. k Kreeg de daarde pries.
Op de cursus kwam k Lou Meyer tegen. Hai woonde in Stad en haar, net as mie, zien jeugd op Muzzelknoal deurbrocht. Lou haar ook al wat verhoalen schreven.
Noa òfloop van de les gungen we noar t kefé. Wie pruiten over de cursus dij wie aan t volgen wazzen. We kwammen tot de conclusie dat we baaide groag schrieven wollen in de toal zoas ze dat in de Knoalstreek proaten.
Wie hebben dou bedocht dat we t Knoalster Schrievers Genootschop in t leven roupen mozzen.
In Stad heb k t manuscript van mien bouk in t Knoalster Grunnegs kloar mokt.  

Even veurstellen: Lou Meyer

Ik bin in 1948 geboren bie d’iesdern klabbe op Muzzelknoal. Op mien negentiende joar bin k vertrokken noar Stad om doar 38 joar as plietsieman aan t waark te wezen.
Tiedens mien waark bleef k, as t mor even kon, Knoalsters proaten. Mien boazen wazzen der nait bliede mit. k Zee den mainsttied dat zai hier mor op veziede wazzen en ik nait.

Vieftien joar leden bin k verhoaltjes begonnen te schrieven in t Hollands. Dit bevuil mie nait omdat k nog in t Knoalsters dacht en mien grunneger gevuilens in t Hollands nait kwiet kon.
Mien eerste verhoaltjes in t Knoalsters heb k opstuurd noar t tiedschrift ‘Toal en Taiken’. Van dij verhoaltjes wuiren der zezze publiceerd, woar k slim trots op was.
k Heb wel wat leerd op de cursus ‘Grunneger Toal veur Begunners’ mor der mot nog wat bie. Doar liekt mie t Knoalster Schrievers Genootschop goud veur. k Geleuf dat je, as schrievers in dezulfde toal, onderling veul van mekoar leren kinnen.

In 2006 dee k mit aan de Knoalster Schriefwedstried, organiseerd deur de gemainte Stadsknoal. k Was verbaldereerd dat k d’eerste pries won. Veur mie was dat, op dat mement, de grootste pries dij der te winnen was.
k Bin nou bezeg mit n bundeltje verhoalen in t Knoalsters te schrieven. t Gaait over mien jeugd op t Knoal en mien waark as plietsieman. As k der tevreden over bin, kin dat bouk uutgeven worden. Op t heden is t nog nait zo wied. k Stuur mien verhoaltjes wel noar mien vrunden en femilie. Aan heur kompelmenten heb nou eerst wel genog.